Azərbaycan Maliyyə Bazarlarına Nəzarət Palatasında (MBNP) “Visa Inc.” beynəlxalq kart təşkilatının baş vitse-prezidenti, MDB və Cənub-Şərq Avropa qrup ölkələri üzrə meneceri Vira Platonovanın başçılıq etdiyi nümayəndə heyəti ilə görüş keçirilib.
MBNP-dən ONA-ya verilən məlumata görə, görüşdə birgə əməkdaşlıq istiqamətləri, ödəniş kartları bazarında aparılan islahatlara və qarşılıqlı maraq doğuran məsələlərə toxunulub.
Görüşdə rəqəmsal transformasiyanın sürətləndirilməsi, ödəniş kartları bazarında innovativ ödəniş həllərinin tətbiqi, habelə ölkədə maliyyə inklüzivliyinin gücləndirilməsi istiqamətində atılan addımlara dair qonaqlara məlumat verilib. Həmçinin, ödəniş kartları bazarının cari inkişaf vəziyyəti və müşahidə olunan tendensiyalara toxulunub.
Rəqəmsal ödənişlər sahəsində həyata keçirilən islahatlar və inkişaf tendensiyalarının müzakirə olunduğu görüşdə, Palata tərəfindən ödəniş xidmətləri və ödəniş sistemləri sahəsində yeni hüquqi çərçivənin formalaşdırılması, banklarda elektron bankçılıq xidmətlərinin tətbiqinin genişləndirilməsi və innovativ ödəniş həllərinin istifadəsinin kütləviləşdirilməsi istiqamətində həyata keçirilən layihələr haqqında ətraflı məlumat açıqlanıb.
"Visa Inc." beynəlxalq kart təşkilatının baş vitse-prezidenti, MDB və Cənub-Şərq Avropa qrup ölkələri üzrə meneceri Vira Platonova görüş zamanı bildirib ki, Azərbaycan Respublikasında nağdsız ödənişlərin inkişafı üçün böyük potensial mövcuddur. "Visa Inc." beynəlxalq kart təşkilatı tərəfindən aparılan təhlillərə əsasən, sonuncu il ərzində ölkədə nağdsız ödənişlərin həcmi 42%, sayı isə 33% artıb. Bu cür müsbət dinamika və qlobal ekspertizaya əsaslanaraq nağdsız ödənişlərdə innovativ ödəniş həllərinə aktiv tələbat mövcuddur. "Visa Inc." beynəlxalq kart təşkilatı əmindir ki, birgə səylərimiz ölkədə ödəniş ekosisteminin inkişafına müsbət təsir göstərəcək.
Görüşdə Palata ilə "Visa Inc." beynəlxalq kart təşkilatı arasında əməkdaşlıq münasibətlərinin gələcək inkişaf perspektivləri və tərəfləri maraqlandıran digər istiqamətlər üzrə məsələlərə dair fikir mübadiləsi aparılıb.
