Azərbaycan 44 günlük savaş nəticəsində ərazi bütövlüyünü təmin etdikdən sonra ərazisində qalmış terrorçu-diversantlara qarşı beynəlxalq hüquqa əsaslanaraq antiterror əməliyyatı həyata keçirməsi bəzi dünya güclərinin qıcığına səbəb olub. Həmin güclər Azərbaycanın tarixi qələbəsini hələ də həzm edə bilmir, ölkəmizə qarşı çirkin ssenarilər planlaşdırırlar.
Erməni lobbisinin fəal olduğu ölkələrdə isə bu tendensiya daha çox müşahidə edilir.
ABŞ-da erməni diasporunun əsas təşkilatı olan Amerikanın Erməni Milli Komitəsinin yaydığı məlumata əsasən, ABŞ Konqresinin Nümayəndələr Palatasında Erməni Qrupunun üzvləri Adam Şiff, Ceki Speyr, Frenk Pellone, Qus Bilirakis və David Valadao tərəfindən Azərbaycanın maraqlarına zidd olan yeni qətnamə layihəsi hazırlanıb.
Sözügedən qətnamə layihəsi hələ Nümayəndələr Palatasına daxil olmayıb. Lakin erməni lobbisi bu sənədin qəbuluna çalışır.
Sözügedən layihədə qeyd edilir ki, “2020-ci il 9 noyabr tarixli Üçtərəfli Bəyanatın tələblərinin, xüsusilə hərbi əsirlərin qaytarılması ilə bağlı razılaşmanın Ermənistan tərəfindən tamamilə icra edildiyinə rəğmən, Azərbaycan tərəfi hələ də 200-ə yaxın hərbi və mülki şəxslərin “girov” kimi saxlayır”.
Göründüyü kimi, 30 ilə yaxın müddətdə Azərbaycana qarşı həyata keçirilən işğal və soyqırımı siyasətinə göz yuman bəzi siyasətçilər Bakının qələbəsini həzm edə bilmirlər.
Qətnamə layihəsinin müəlliflərindən olan F. Pallone Konqresin Nümayəndələr Palatasının Xarici maliyyələşdirmə üzrə sədri Nitu Lounu özünün Dağlıq Qarabağa səfərlərə məhdudiyyətləri aradan qaldırmaq üçün qətnaməyə uyğun qanuni səylərini dəstəkləməyə, bununla da ABŞ Dövlət Departamentinin Dağlıq Qarabağa səfərlərə qoyduğu məhdudiyyətlərə son qoymağa çağırıb. Ermənipərəst konqresmen ABŞ-la qondarma rejimin birbaşa münasibətlərinin dərinləşməsi, əlaqələrin genişlənməsinin vacibliyinə diqqəti yönəldib. ABŞ-ın ermənipərəst konqresmenlərinin belə qərəzli mövqeyi ABŞ-ın Azərbaycandakı imicinə də ciddi xələl gətirir. F. Pallone Ermənistan silahlı qüvvələri tərəfindən işğal olunmuş ərazilərinə qanunsuz səfər edərək Azərbaycanın ərazi bütövlüyü və suverenliyini nümayişkaranə şəkildə pozan ABŞ konqresmenlərindən biridir və rəsmi Bakı konqresmenin bu qanuna zidd əməllərini dəfələrlə pisləyib. Azərbaycan F. Palloneni və onun məsləkdaşlarını “qara siyahı”ya daxil edib.
Qətnamə layihəsində tamamilə böhtan xarakterli iddialar mövcuddur. Məsələn, “Human Rights Watch” və Kolumbiya Universitetinin İnsan Haqlarının Tədqiqatı üzrə İnstitutunun məruzələrinə istinad olunaraq guya müharibə dövründə Azərbaycan Ordusu və Türkiyənin dəstəklədiyi islamçı döyüşçülər tərəfindən ermənilərə qarşı irimiqyaslı hərbi cinayətlər törədildiyi iddia olunur. Prezident İlham Əliyev dəfələrlə bəyan edib ki, bu barədə danışanlar bircə fakt belə göstərə bilmirlər. Əksinə, erməni tərəfdə çoxsaylı terrorçunun savaşdığı faktı sübuta yetirilib. Göründüyü kimi, qərəz göz önündədir və belə addımlar, belə cəhdlər ABŞ-ın nüfuzuna ciddi zərbə kimi dəyərləndirilə bilər.
Unutmaq lazım deyil ki, ABŞ ATƏT-in Minsk Qrupunun həmsədrlərindən biridir. Əgər belə qətnamə layihəsi qəbul edilərsə, bu, vasitəçilik missiyasına vurulan zərbə kimi dəyərləndirilə bilər. ABŞ Konqresi maliyyə mənbələri şübhəli olan Amerika Erməni Milli Komitəsinin əlində oyuncağa çevrilməməlidir.
Qeyd edək ki, adıçəkilən layihə Adam Şiff, Ceki Speyr, Frenk Pellone, Qus Bilirakis və David Valadao kimi erməni diasporunun təsirində olan siyasətçilərin ilk ermənipərəst addımı deyil, onlar dəfələrlə belə təşəbbüslə çıxış edib. Məsələn, F. Pallone bir qədər öncə bəyan etmişdi ki, Qarabağa getmək üçün ABŞ-a məxsus nəqliyyat vasitələrindən istifadə edə bilmir və bunun qarşısı alınmalıdır.
Qeyd edək ki, Azərbaycan bütün ölkələrlə normal münasibətlər qurmaqda maraqlıdır. Bəzi konqresmenlərin beynəlxalq hüquqa zidd, Azərbaycanın ərazi bütövlüyünü şübhə altında qoyan addımları isə ABŞ-Azərbaycan münasibətlərinin pozulmasına yönəlib. ABŞ kimi güclü bir ölkə erməni lobbisinin maliyyəsindən asılı olan bir neçə konqresmenə görə Azərbaycan kimi önəmli tərəfdaşı, bölgənin ən mühüm oyunçularından birini itirmək perspektivini nəzərə almağa məhkumdur. Azərbaycan dəfələrlə ABŞ-da fəaliyyət göstərən erməni lobbisinin təsirində olan konqresmenlər barədə ölçü götürülməsini tələb edib. Xatırladaq ki, illər öncə konqresmen Kristian Smit özünü ermənilərin vəkili kimi aparırdı. Əslində, baş verənlərin pərdəarxası da bəllidir. Vaşinqton üçün Rusiyanın forpostu olan, səfil İrəvan deyil, məhz bütün beynəlxalq layihələrə qoşulan Bakı daha cəlbedicidir. Hazırkı vəziyyətdə Vaşinqton Bakı ilə daha sıx əməkdaşlığa can atır və belə bir vaxtda ermənipərəst konqresmenlərin əsas niyyətləri ABŞ-Azərbaycan münasibətlərinin inkişafının qarşısını almaqdan ibarətdir. Ehtimal etmək olar ki, hər dəfə olduğu kimi, bu dəfə də erməni lobbisinin belə cəhdlərinin heç bir faydası olmayacaq. Amerikalı siyasətçilər nəzərə almalıdırlar ki, Azərbaycan 44 gün ərzində terrorçuluğa qarşı mübarizə aparıb. Vaşinqton da terrorçuluğa qarşı olduğunu bəyan edir. Bir neçə konqresmen isə separatçı, tanınmamış hərbi xunta rejimini, terrorçuları açıq şəkildə müdafiə edir.
Azərbaycan Prezidenti İlham Əliyevin də qeyd etdiyi kimi, qondarma rejimi heç Ermənistanın özünün tanımağa cəsarətinin çatmayıb. Odur ki, bir qondarma qurumu, xunta rejimini özünü dünyanın ən demokratik ölkəsinin bəzi konqresmenlərinin “tanıması”na əlbəttə ki, Azərbaycan seyrçi qala bilməz. Ümumiyyətlə, belə addımlar ABŞ-ın özü üçün utanc gətirir.
Onu da qeyd edək ki, Azərbaycan erməni əsirləri təhvil verib. Terrorçularla isə bütün dünyada eyni dildə danışırlar. Elə ABŞ-ın özündə də terrorçularla heç bir danışığa gedilmir, onlar dərhal məhv edilir. Belə olan təqdirdə, ermənipərəst konqresmenlər hansı haqla Bakıdan terrorçuların azad edilməsi şərtinin qəbul edilməsini istəyirlər? Bu tələb ABŞ-ın təbliğ etdiyi dəyərlərlə ziddiyyət təşkil edir. Burada daha çox bir məqam düşündürücüdür - ABŞ Administrasiyası xunta rejimini və terrorçuları dəstəkləyən belə konqresmenlərin fəaliyyətinə hansı səbəbdən bu dərəcədə susqunluq nümayiş etdirir?
Birləşmiş Ştatlar dəfələrlə rəsmi şəkildə bəyan edib ki, bölgədə sülhün bərqərar olmasında maraqlıdır. Lakin adıçəkilən qətnamə layihəsinin müzakirəyə çıxarılma cəhdi Cənubi Qafqaz regionunda sülh və sabitliyin bərqərar edilməsinə yönəlmiş səylərə, o cümlədən 2020-ci il 10 noyabr tarixli Üçtərəfli Bəyanat və ondan irəli gələn fəaliyyətlərə olduqca mənfi təsir göstərir.
Ermənipərəst konqresmenlər Cənubi Qafqazın əsas ölkəsi olan Azərbaycana qarşı belə mövqe sərgiləməklə əslində, Ermənistanın da təhlükəsizliyinə, onun xalqının gələcək rifahına zərbə endirirlər. Məsələ bununla da yekunlaşmır. Vurğulayaq ki, Azərbaycan ərazilərinin işğal altında qaldığı 30 ilə yaxın müddət ərzində ABŞ işğal faktını təsdiqləyən, yüz minlərlə azərbaycanlının məcburi köçkün vəziyyətinə düşməsini qınayan, azərbaycanlı mülki əhalinin davamlı raket atəşinə tutulmasının yolverilməzliyini göstərən heç bir sənəd qəbul etməyib.
Ermənistanın bu illər ərzində Azərbaycan xalqına qarşı törətdiyi çoxsaylı müharibə cinayətləri, xüsusilə Xocalı soyqırımı indiyə qədər ABŞ-da dövlət səviyyəsində pislənməyib.
Buna baxmayaraq, Azərbaycan ABŞ-la sıx əməkdaşlıq edir və bu tərəfdaşlığı davam etdirmək niyyətindədir. Lakin ABŞ Administrasiyası da unutmamalıdır ki, rəsmi Bakı ermənipərəst siyasi dairələrin fəaliyyətindən narazıdır.
Ermənipərəst konqresmenlərin hazırladığı qətnamə layihəsindən danışarkən mühüm bir fakta diqqət yetirməmək olmaz. Birinci Qarabağ müharibəsində itkin düşmüş 4 minə yazın azərbaycanlının aqibətindən indiyə qədər də xəbər yoxdur. Azərbaycan 30 ilə yaxındır bu məsələni ən müxtəlif platformalarda qaldırır, onların taleyinə aydınlıq gətirilməsini istəyir. Lakin bu illər ərzində bir dəfə də görmədik ki, nə ABŞ, nə digər ölkələr, nə də beynəlxalq təşkilatlar itkin düşmüş 4 min azərbaycanlının taleyindən narahatlıqlarını dilə gətirsinlər, onların aqibətinin müəyyən olunması üçün Ermənistana və xunta rejiminə çağırış edib, təzyiq göstərsinlər.
Erməni tərəfi indiyə qədər həmin şəxslərin nə ölməsi, nə də əsirlikdə olması barədə heç nə demir, onlarda bu barədə məlumat olmadığını bildirirdi. Lakin bircə fakt təsdiqlədi ki, ermənilər həmişə olduğu kimi, yenə də bütün dünyaya yalan danışır, riyakarla edirlər. Birinci Qarabağ müharibəsində ermənilər tərəfindən öldürülmüş və Şuşa ətrafında basdırılmış yeddi azərbaycanlının nəşinin qalıqlarının bir müddət əvvəl rəsmi Bakıya verilməsi göstərir ki, Ermənistanın və xuntanın itkin sayılan 4 minə yaxın azərbaycanlının taleyindən xəbəri var. Lakin indiyə kimi onlar bu barədə heç nə deməyiblər, ABŞ və digər ölkələr isə buna görə heç bir addım atmayıb. Belə çıxır ki, 4 min azərbaycanlının aqibəti Azərbaycandan başqa heç kimi maraqlandırmır, nə Vaşinqton, nə digərləri, nə Beynəlxalq Qızıl Xaş Komitəsi bu məsələni gündəmə gətirmir. Niyə? Ona görə ki, onlar azərbaycanlıdır? Ermənistana və separatçı xuntaya bu təzyiqləri bu gün də görmürük. Halbuki 7 nəfərin cəsədinin qalıqlarının verilməsi göstərir ki, itkin düşmüş digər şəxslər barədə də erməni tərəfində məlumatlar var, yaxud ola bilər.
Bu gün 10 noyabr bəyanatından sonra terror-diversiya məqsədilə Azərbaycan ərazilərinə gələn cinayətkarların taleyindən narahatlıq keçirənlər niyə bu 30 ildə 4 min azərbaycanlı haqqında bir cümlə belə danışmırlar?
Beynəlxalq hüquqdan sitata gətirənlərə bir məqamı da xatırlatmaq yerinə düşər. Ermənistan müharibədən sonra minalanmış ərazilərin xəritəsini Azərbaycana təqdim etmir, nəticədə hərbçilər və dinc sakinlər minaya düşərək həlak olur, əlilə çevrilir. Ədalət, beynəlxalq hüquq carçıları – ABŞ, Fransa, Rusiya, beynəlxalq təşkilatlar minalanmış sahələrin xəritələrini Azərbaycana verməsi üçün niyə Ermənistana çağırış, təzyiq etmir? Mina qurbanları azərbaycanlıdır deyə?
Əslində, ABŞ Administrasiyası və Konqresi Cənubi Qafqazda sülhün bərqərar olması istiqamətində ilk addım kimi Üçtərəfli Razılaşmanı dəstəkləyən bəyanatlar verməli, habelə Birinci Qarabağ müharibəsində itkin düşmüş 4 min azərbaycanlının aqibətinin aydınlaşdırılması və minalanmış ərazilərin xəritələrinin Azərbaycana təqdim edilməsi üçün Ermənistana çağırış etməlidir.
Onlar isə bunun əksinə olaraq, vəziyyəti gərginləşdirən, sülh və sabitliyə ziyan vuracaq addımlar atırlar.
Vaşinqton Azərbaycanın ərazi bütövlüyü, suverenliyi və sərhədlərinin toxunulmazlığına hörmət edilməsi tələbinə göz yuma bilməz. Bu tələblər BMT-nin bütün qətnamələrində də əksini tapıb və Birləşmiş Ştatlar ən azı həmin sənədlərə hörmətlə yanaşmağa borcludur. Bu, BMT Təhlükəsizlik Şurasının daimi üzvü kimi ABŞ-ın öhdəliyi və məsuliyyətidir.
Qeyd edək ki, 44 günlük savaş ərzində Azərbaycanın ən başlıca uğuru Dövlət - Ordu-Xalq birliyinə nail olması idi. Bu fakt da sübuta yetirdi ki, Qarabağ məsələsində Azərbaycanda yekdil fikir mövcuddur. Onu da unutmaq olmaz ki, biz artıq qalib gəlmişik və qələbəmizə kölgə salacaq bütün cəhdlərə qarşı birlikdə mübarizə aparacağıq.
APA Analyitcs
