ABŞ prezidenti Co Bayden və Çin Xalq Respublikasının sədri Si Tsinpin arasında telefon bağlantısı baş tutub.
APA TASS-a istinadən xəbər verir ki, Bayden prezidentlik fəaliyyətinə başladıqdan sonra Çin lideri ilə yaratdığı ilk telefon danışığında yeni növ koronavirusun yayılmasına qarşı mübarizə, iqlim dəyişikliyi və dünyada silahların yayılmasının qarşısını alınması məsələlərini müzakirə edib. Bu barədə Ağ Evin tərəfindən yayımlanan yazılı açıqlamada qeyd olunub.
Açıqlamaya görə, “iki lider COVID-19 pandemiyasına qarşı mübarizə, səhiyyə sahəsindəki qlobal təhlükəsizlik, iqlim dəyişikliyi və silahların yayılmasının qarşısının alınması ilə bağlı fikir mübadiləsi aparıblar”.
Ağ Evin məlumatında, həmçinin bildirilir ki, “ABŞ örezidenti Honkonq, Sintszyan-Uyğur Muxtar Rayonu (XUAR) və Tayvandakı vəziyyətdən narahatlığını dilə gətirib”.
“Prezident Bayden təhlükəsizliyin təmin olunmasının, Amerika xalqının firavanlığının, sağlamlığının və həyat tərzinin qorunmasının, eləcə də Hind-Sakit okean regionunda açıq məkanın qorunmasının prioritet cəhətlərini çatdırıb. Prezident Bayden Pekinin məcburi və ədalətsiz iqtisadi təcrübəsi, Honkonqdakı repressiyalar, Sintszyanda insan haqlarının pozulması və ÇXR-in bölgədə, o cümlədən Tayvanla münasibətdə getdikcə artan aqressiv hərəkətləri ilə əlaqədar dərin narahatlığını vurğulayıb”, - deyə Ağ Evin açıqlamasında bildirilib.
Amerika lideri, həmçinin “Ay təqvimi üzrə Yeni il münasibətilə Çin xalqına təbriklərini və xoş arzularını çatdırıb”.
ABŞ lideri ÇXR-in sədri ilə söhbətini özünün “Twitter” səhifəsində də şərh edib: “Ona dedim ki, bunun Amerika xalqına faydasının olacağı vaxt Çinlə işləyəcəm”.
***
Saat 04:59
ABŞ prezidenti Co Bayden Çin Xalq Respublikasının sədri Si Tsinpinlə telefon bağlantısı yaratmağı planlaşdırır.
APA xəbər verir ki, bu barədə “Bloomberg” özəl mənbələrə istinadən məlumat yayıb.
Məlumata görə, telefon danışığı baş tutarsa, bu, 20 yanvar tarixində Co Baydenin vəzifə səlahiyyətlərinin icrasına başladığı gündən bəri iki ölkə lideri arasında ilk söhbət olacaq.
Ağ Ev “Bloomberg” agentliyinin yaydığı bu məlumatla bağlı hələlik münasibət bildirməyib.
