ABŞ administrasiyası Tayvana 8 milyard dollar dəyərində 66 ədəd “F-16” döyüş təyyarəsi və ona aid avadanlıqlar göndərilməsi qərarı ilə bağlı ABŞ Konqresini rəsmi olaraq məlumatlandırıb.
APA “TASS” agentliyinə istinadən xəbər verir ki, bu barədə jurnalistlərə açıqlamasında Dövlət Departamentinin nümayəndəsi deyib.
“Bu gün administrasiya ABŞ Dövlət Departamentinin nəzarət etdiyi xarici hərbi kömək proqramı çərçivəsində Tayvanın 8 milyard dollarlıq 66 ədəd “F-16C/D Block 70” qırıcıları ilə, eləcə də ehtiyat hissələri və döyüş sursatları ilə təchiz edilməsi haqqında qərarını rəsmən Konqresə çatdırıb”, - deyə amerikalı diplomat bildirib.
ABŞ Müdafiə Nazirliyinə tabe olan bir dövlət qurumunun məlumatına görə, qırıcıların tədarükü "bölgədəki əsas hərbi tarazlığı dəyişdirməyəcək". Bu qurum hökumətlərarası müqavilələr əsasında xaricə hərbi texnika və silah tədarükünə, ABŞ Silahlı Qüvvələri ilə digər ölkələr arasında əlaqələrin inkişafı və Vaşinqtonun müdafiə sahəsində xarici tərəfdaşlarına maddi və texniki yardım göstərilməsinə məsuliyyət daşıyır.
Bazar ertəsi günü Çinin Xarici İşlər Nazirliyinin sözçüsü Gen Şuan ABŞ-ın Tayvana “F-16” tədarük etmək planlarına münasibət bildirərək, belə əməliyyatın baş tutacağı təqdirdə Pekinin öz maraqlarını qoruması üçün cavab tədbirləri atacağını deyib. O, həmçinin qeyd edib ki, Çin Vaşinqtonun bu planı ilə əlaqədar kəskin etirazını ifadə edir.
