Peru polisi ölkədə tətbiq edilmiş karantin rejimi çərçivəsində qanunsuz fəaliyyət göstərən “Thomas Restobar” adlı gecə klubuna basqın edib.
APA-nın Reuters-ə istinadən verdiyi xəbərə görə, 120 nəfərin toplaşdığı klubda insanlar qaçmaq istəyərkən yaranan sıxlıq nəticəsində 13 nəfər ölüb, 6 nəfər yaralanıb.
Daxili İşlər Nazirliyinin məlumatına görə, ölənlərin 20-30 yaş arasında olduğu bildirilib. Onlardan 11-i kişi, 2-si qadın olub.
Azı 23 nəfər polis tərəfindən saxlanılıb, klub sahibi həbs edilib.
Qeyd edək ki, Peruda ümumilikdə 585 236 koronavirus hadisəsi qeydə alınıb, ölənlərin sayı 27 453 nəfərə çatıb.
