“Rusiyanın Belarusdakı səfirinin dəyişməsi Moskva və Minsk arasındakı münasibətlərdə böhranın olduğu anlamına gəlmir”.
ONA-nın Moskva müxbirinin verdiyi məlumata görə, bunu Rusiya xarici işlər nazirinin müavini Qriqori Karasin bildirib.
“Normal gedişdir. Diplomatik təcrübədə müxtəlif kazuslar olur. Rusiya və Belarus münasibətləri strateji müttəfiqlik xarakteri daşıyır” - deyə Karasin vurğulayıb.
Rusiya XİN başçısının müavini iki ölkənin tərəfdaşlığına nikbinliklə baxmağın vacib olduğunu söyləyib: “Bu müttəfiq dövlətlərin inteqrasiyası dərinləşdirilməlidir. Belə iş artıq aparılır”.
Qeyd edək ki, aprelin 30-da Rusiya prezidenti Vladimir Putin Belarusdakı səfir Mixail Babiçi vəzifəsindən azad edib, onun yerinə Federasiya Şurasının komitə sədri Dmitri Mezentsev təyin olunub.
M.Babiç 2018-ci ilin avqustunda Rusiyanın Belarusdakı səfiri vəzifəsinə təyin olunub. Ötən ay Belarus XİN rusiyalı səfiri iki ölkə arasında münasibətləri korlamaqda ittiham edib.
