Bakı şəhər Prokurorluğu və Təhsil İdarəsi 8-ci sinif şagirdinin intiharı ilə bağlı məlumat yayıb
  • HADİSƏ

  • 17:30 06 Aprel 2019

Bakı şəhər Prokurorluğu və Təhsil İdarəsi 8-ci sinif şagirdinin intiharı ilə bağlı məlumat yayıb

Bakı şəhər Prokurorluğu və Bakı Şəhəri üzrə Təhsil İdarəsi 162 nömrəli tam orta məktəbin VIII sinif şagirdinin ölümü ilə bağlı xəbər yayıb. ONA-nın məlumatına görə, bildirilir ki, aprelin 4-də Bakı şəhəri Səbail rayonu Etibar Əliyev adına 162 nömrəli tam orta məktəbin VIII sinif şagirdi (müvafiq səbəblərə görə şagirdin adı qeyd olunmur) məktəbin III mərtəbəsindən yıxılaraq müxtəlif dərəcəli bədən xəsarətləri alıb.

Xəsarət almış şəxs müalicə olunmaq üçün 1 saylı Şəhər Klinik Xəstəxanasına yerləşdirilib. Aparılan müalicə tədbirlərinə baxmayaraq, o, aprelin 6-da xəstəxanada vəfat edib.

Faktla bağlı Bakı şəhər Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb, iş üzrə müvafiq ekspertizalar təyin edilib və digər zəruri istintaq tədbirləri həyata keçirilir.

Eyni zamanda, Bakı Şəhəri üzrə Təhsil İdarəsi tərəfindən qeyd olunan məsələ ilə bağlı xidməti araşdırma aparılır. Hadisə ilə bağlı şəhər prokurorluğu və şəhər Təhsil İdarəsi tərəfindən müvafiq araşdırmalar aparıldığı bir vaxtda kütləvi informasiya vasitələrinin nümayəndələri və sosial şəbəkə istifadəçilərinə araşdırmaların nəticələrini gözləmək tövsiyə edilir.

OXŞAR XƏBƏRLƏR