Bakıda yaşayış binasında baş verən yanğın söndürülüb.
ONA-nın məlumatına görə, bu barədə jurnalistlərə Dövlət Yanğından Mühafizə Xidmətinin qərargah rəisi Əkbər Novruzov bildirib. O, qeyd edib ki, hadisə barədə nazirliyin “112” qaynar xəttinə saat 12.55 radələrində məlumat daxil olub. Dərhal yanğından mühafizə xidmətinin 70-ə yaxın əməkdaşı və 18 yanğınsöndürən maşını hadisə yerinə cəlb olunub: “Yanğın zamanı 60 bina sakini təxliyə edilib. Tüstüdən zəhərlənmə halları qeydə alınıb. Həmin şəxslər xəstəxanalara aparılıb. Yanğın tam söndürülüb”.
İlkin ehtimala görə, hadisəyə elektrik xəttlərinin yüklənməsi səbəb olub.
Saat 15:08
***
Bakıda yaşayış binasında baş verən yanğın lokallaşdırılıb.
ONA-nın hadisə yerində olan əməkdaşının verdiyi məlumat görə, hazırda binada tüstülənmə davam edir.
Dövlət Yanğından Mühafizə Xidmətinin qərargah rəisi Əkbər Novruzov ONA-ya bildirib ki, yanğın baş verən binadan 60-a yaxın insan təxliyə edilib: “Təxliyə olunanlar arasında tüstüdən zəhərlənənlər var. Onlar xəstəxanaya yerləşdirilib. Sakinlər və xilasedicilər arasında xəsarət alan yoxdur”.
Hadisə ilə bağlı Fövqəladə Hallar Nazirliyi də məlumat yayıb.
Məlumatda qeyd olunur ki, Bakı şəhəri, Yasamal rayonu, Şəfayət Mehdiyev küçəsində çoxmərtəbəli yaşayış binasında elektrik kabellərində yaranmış tüstülənmənin qarşısı alınıb.
Saat 13:55
***
Bakıda yaşayış kompleksində baş verən yanğın davam edir.
ONA-nın hadisə yerində olan əməkdaşının verdiyi məlumata görə, Şəfayət Mehdiyev küçəsində yerləşən 24 mərtəbəli yaşayış kompleksində baş verən yanğının söndürülməsinə 5 yanğınsöndürən maşın cəlb edilib.
Yanğın baş verən binanın sakinləri təxliyə edilir.
Yanğınla bağlı əraziyə 5 təcili tibbi yardım briqadası cəlb olunub.
Səhiyyə Nazirliyinin mətbuat xidmətinin əməkdaşı Səfayə Əhmədovanın ONA-ya verdiyi məlumata görə, hadisə yerində tüstüdən zəhərlənmiş bir neçə nəfərə ilkin tibbi yardım göstərilib, onların həyati təhlükəsi yoxdur.
Saat 13:15
***
Bakıda yaşayış binası yanır.
ONA-nın məlumatına görə, hadisə paytaxtın Yasamal rayonu, “Lider” televiziyasının yaxınlığında qeydə alınıb.
Yanğının söndürülməsinə Fövqəladə Hallar Nazirliyinin Dövlət Yanğından Mühafizə Xidmətinin yanğınsöndürənləri cəlb edilib.
