"Hadisə bu gün saat 12.00 radələrində baş verib və Dövlət Turizm Agentliyinin əməkdaşları hadisə barədə məlumat alan kimi Şəkiyə yollanıblar".
APA-nın məlumatına görə, bunu Şəki Xan sarayında Xan çinarın budağı qırılması və 19 nəfər xəsarət alması barədə jurnalistlərin suallarını cavablandıran Dövlət Turizm Agentliyinin sədri Fuad Nağıyev bildirib.
F. Nağıyev hazırda digər müvafiq dövlət qurumlarının əməkdaşlarının da hadisə yerində olduğunu söyləyib: "Hadisə nəticəsində 19 nəfər xəsarət alıb. Xəsarət alanlardan 12 nəfər Azərbaycan vətəndaşı, 2 nəfər Rusiya, 5 nəfər Suriya vətəndaşıdır. Hazırda xəsarət alanların əksəriyyətinin vəziyyəti stabildir. Fövqəladə Hallar Nazirliyinin helikopteri artıq Şəki aeroportundadır. Bakıdan təcrübəli mütəxəssislər Şəkiyə gəlib və məhz onlar xəsarət alanlardan neçə nəfərin Bakıya aparılmasına qərar verir".
Dövlət Turizm Agentliyinin sədri qeyd edib ki, xəsarət alan bir qadın təcili tibbi yardım maşını ilə Bakıya göndəriləcək: "Digər 3 nəfər isə helikopter vasitəsi ilə Bakıya göndəriləcək".
F. Nağıyev hadisə nəticəsində ölüm halının olması barədə yayılmış məlumatın həqiqəti əks etdirmədiyini nəzərə çatdırıb: "Bir nəfərin vəziyyəti ağırdır. Məsələ ilk dəqiqdən Prezident İlham Əliyevin şəxsi nəzarətindədir".
APA-nın yerli bürosunun əldə etdiyi məlumata görə, helikopterlə Bakıya yola salınacaq 3 nəfər Suriya vətəndaşlarıdır. Həmin Suriya vətəndaşlarının vəziyyəti orta-ağırdır. Ağır xəsarət alan bir qadın isə təcili tibbi yardım maşını ilə Bakıya yola salınacaq. Həkimlər vəziyyəti ağır olan qadının təcili tibbi yardım maşını ilə aparılmasını vacib sayıblar.
