Azərbaycanın Fövqəladə Hallar Nazirliyinin (FHN) qüvvələri tərəfindən Kahramanmaraş şəhərinin sakinləri üçün müvəqqəti çadırlar qurulur.
ONA APA-ya istinadən xəbər verir ki, FHN qüvvələri Azərbaycandan göndərilən çadırları şəhərin Doğukənd məhəlləsində qurmağa başlayıb.
FHN-in İctimaiyyətlə Əlaqələr İdarəsinin baş məsləhətçisi Turqay Abbaslı jurnalistlərə açıqlamasında bildirib ki, Doğukənd məhəlləsində zərərçəkmişlər üçün çadır şəhərciyinin qurulması prosesi aparılır: “Prezident İlham Əliyevin tapşırığına uyğun olaraq, FHN tərəfindən Türkiyədə baş vermiş zəlzələ ilə bağlı qardaş ölkəyə humanitar yardım göndərilib. Hazırkı vaxta qədər nazirlik tərəfindən 10 təyyarə, 3 avtomobil karvanı Türkiyəyə gəlib çatıb. Avtomobillərin sayı isə 39-dur. Maşınların içərisində müxtəlif ölçülü çadırlar, generatorlardan və digər lazım olan əşyalar var”.
