İqbal Ağazadə məhkəmədə zərərçəkmiş qismində ifadə verib
  • HADİSƏ

  • 16:59 06 May 2019

İqbal Ağazadə məhkəmədə zərərçəkmiş qismində ifadə verib

Bu gün Bakı Ağır Cinayətlər Məhkəməsində Ümid Partiyasının sədri, keçmiş deputat İqbal Ağazadəyə qarşı dələduzluq etməkdə təqsirləndirilən Sərməs Tağıyevin cinayət işi üzrə məhkəmə prosesi davam etdirilib.

ONA-nın xəbərinə görə, hakim Rahib Salmanovun sədrliyi ilə keçirilən prosesdə zərərçəkmiş qismində İ.Ağazadə ifadə verib.

O, təqsirləndirilən S.Tağıyev tərəfindən ona qarşı 165 min manatlıq dələduz edildiyini etiraf edib. İ.Ağazadə dəymiş ziyanın ödənildiyini, S.Tağıyevdən şikayətçi olmadığını, onu bağışladığını bildirib.

Məhkəmə prosesi mayın 10-dək təxirə düşüb.

İttihama görə, S.Tağıyev İ.Ağazadənin etibarından sui-istifadə edərək, onun 165 min manat pulunu dələduzluq yolu ilə ələ keçirib. Ona qarşı Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham irəli sürülüb.

Xatırladaq ki, S.Tağıyev daha əvvəl də eyni maddə ilə mühakimə olunub. O, 5 avqust 2015-ci il tarixdə Bayram Hüseynovun oğlu Ramin Hüseynlinin adına İpoteka Fondundan 70 min manat kredit götürməyə kömək edəcəyini vəd verib və 4 min manat pul alıb. Bundan başqa, S.Tağıyev 18 avqust 2015-ci il tarixdə İbrahim Cəbiyevə İpoteka Fondundan 50 min manat kredit götürəcəyini vəd edərək, Abşeron rayonu Xırdalan şəhəri Dövlət Əmlak Agentliyinin inzibati binasında yerləşən ev alqı-satqı ofisində 10 min manat pul alıb.

Bakı Ağır Cinayətlər Məhkəməsinin hökmü ilə S.Tağıyev 8 il müddətinə azadlıqdan məhrum edilib. O, hökmdən narazı qalaraq, apellyasiya şikayəti verib və cəzasının yüngülləşdirilməsini istəyib. Sumqayıt Apelyasiya Məhkəməsinin qərarı ilə S.Tağıyevin barəsində Cinayət Məcəlləsinin 70-ci (şərti məhkum etmə) maddəsi tətbiq edilib və o, azadlığa buraxılıb.

OXŞAR XƏBƏRLƏR