Məktəb direktorunu döyməkdə təqsirləndirilən aktyorun cinayət işi məhkəmə baxışına verilib
  • HADİSƏ

  • 11:07 19 Aprel 2019

Məktəb direktorunu döyməkdə təqsirləndirilən aktyorun cinayət işi məhkəmə baxışına verilib

Nizami Rayon Məhkəməsində xuliqanlıqda təqsirləndirilən aktyor Rza Rzayev və bacısı oğlu Toğrul İbrahimlinin cinayət işi üzrə məhkəmənin hazırlıq iclası davam etdirilib.

Bunu ONA-ya açıqlamasında R.Rzayevin vəkili Səlahəddin Cəfərov deyib.

Onun sözlərinə görə, hakim Nəriman Mehdiyevin sədrliyi ilə keçirilən prosesdə cinayət işinin məhkəmə baxışına verilməsi qərara alınıb.

Məhkəmə baxışı mayın 1-nə təyin edilib.

Qeyd edək ki, martın 4-də Nizami Rayon Məhkəməsində aktyor Rza Rzayevin və 175 saylı orta məktəbin direktoru Tural Mirzəliyevin məhkəməsinin ilkin hazırlıq iclası olub. Lakin hakim Ələddin Cəfərov işə baxmaqdan imtina edib. O bildirib ki, tərəflər arasında baş verən insidentin şahidi olub və obyektivlik təmin olunsun deyə özü-özünə etiraz qərarı verib.

Xatırladaq ki, aktyor Rza Rzayevlə 175 saylı orta məktəbin direktoru Tural Mirzəliyev arasında uzun müddətdir davam edən münaqişə dava ilə nəticələnib. Dava zamanı xəsarət alan Tural Mirzəliyev məhkəməyə müraciət edib. Faktla bağlı Cinayət Məcəlləsinin 221.3-cü (xuliqanlıq, silahdan və ya silah qismində istifadə olunan əşyalardan istifadə edilməklə zərər çəkmiş şəxsə zor tətbiq olunması) və 221.1-ci (xuliqanlıq, ictimai qaydanı kobud surətdə pozma, zor tətbiq etmə) maddələri ilə cinayət işi başlanıb.

OXŞAR XƏBƏRLƏR