Cəlilabad Rayon Polis Şöbəsi əməkdaşları tərəfindən həyata keçirilən əməliyyat-axtarış tədbiri nəticəsində narkotik vasitələrin qanunsuz dövriyyəsi ilə məşğul olan mütəşəkkil cinayətkar dəstənin üzvləri zərərsizləşdirilib.
ONA-nın xəbərinə görə, Daxili İşlər Nazirliyinin (DİN) mətbuat xidmətinin məlumatında bildirilir ki, daxil olan məlumat əsasında rayon sakini Ehtibar Məmmədov yaşadığı Ə.Cavad küçəsində saxlanılıb. Onun evinə baxış zamanı su borusunun içərisində gizlətdiyi 304,210 qram narkotik vasitə heroin aşkar edilərək götürülüb.
Əməliyyat tədbirlərinin davamı olaraq E.Məmmədovla birlikdə narkotik vasitələrin qanunsuz dövriyyəsində iştirak edən Cəlilabad rayon sakinləri Əyyub Şükürov və Rəşad Yusubov da tutularaq istintaqa təqdim ediliblər. Araşdırma zamanı müəyyən edilib ki, qrup üzvləri aralarındakı rol bölgüsünə əsasən, İrandan Azərbaycana satmaq niyyəti ilə narkotik vasitə gətiriblər. Onlar şəxsiyyəti istintaqa məlum olmayan İran vətəndaşları ilə razılığa gələrək Ə.Şükürovu həmin şəxslərin yanında girov qoyub, külli miqdarda heroin əldə ediblər. E.Şükürov orada qalandan sonra digər iki nəfər narkotik vasitəni Bakı-Astara magistral yolunun Lənkəran rayonu ərazisindən keçən hissəsində götürərək R.Yusubovun avtomobili ilə Cəlilabad rayonuna gətiriblər.
E.Məmmədov və R.Yusubov əldə etdikləri narkotik vasitənin bir qismini Cəlilabad rayonunda qabaqcadan razılığa gəldikləri Qismət Hüseynov və Mirzağa Əzizova 15500 manata satmaq istəyən zaman isə sonuncular pulu ödəməkdən imtina ediblər. Onlar tapançaya oxşar predmetlə və bıçaqla hədələməklə Ehtibar Məmmədova zor tətbiq edib xəsarət yetirərək, quldurluq yolu ilə külli miqdarda narkotik vasitəni talayıb aparıblar.
Qeyd edək ki, narkotik vasitələri talayaraq əldə edən Q.Hüseynov və M.Əzizov da saxlanılaraq istintaqa təqdim ediliblər.
M.Əzizovun Səbail rayonunda yaşadığı evdə quldurluq yolu ilə talayıb götürdükləri 580,850 qram heroin aşkar edilib.
Faktla bağlı Cəlilabad Rayon Polis Şöbəsində Cinayət Məcəlləsinin 234.4.1 (qanunsuz olaraq narkotik vasitələri, psixotrop maddələri və ya onların
prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) 234.4.3 (külli miqdarda törədildikdə), 235.4.2 (narkotik vasitələri, psixotrop maddələri və ya onların prekursorlarını talama və ya hədə- qorxu ilə tələb etmə, külli miqdarda törədildikdə) və 235.4.3 (həyat və ya sağlamlıq üçün təhlükəli olan zor tətbiq etməklə və ya belə zor tətbiq etmək hədəsi ilə törədildikdə) maddələri ilə cinayət işi başlanılıb, araşdırmalar və əməliyyat tədbirləri davam etdirilir.
