Bakıda yaşayış binasında baş verən yanğın nəticəsində tüstüdən zəhərlənərək 1 saylı Kliniki Tibbi Mərkəzin Toksikologiya şöbəsinə yerləşdirilən şəxslərin hamısı evə buraxılıb.
Bu barədə ONA-ya Səhiyyə Nazirliyinin mətbuat xidmətindən bildirilib.
Saat 15:28
***
Bakıdakı yanğınla bağlı Respublika Toksikologiya Mərkəzinə yerləşdirilənlərin sayı artıb.
Səhiyyə Nazirliyinin mətbuat xidmətindən ONA-ya verilən məlumata görə, bunlar 3 aylıq körpə və 43 yaşlı kişidir. Bundan əvvəl isə, mərkəzə 26 və 53 yaşlı qadınlar yerləşdirilib. Onların vəziyyətləri orta ağırdır.
Saat 14:58
***
Yanan binadan çıxarılan 13 nəfərə yerindəcə ilkin tibbi yardım göstərilib.
Bu barədə ONA-ya Səhiyyə Nazirliyinin mətbuat xidmətinin əməkdaşı Səfayə Əhmədova məlumat verib.
Onun sözlərinə görə, onlardan 6-sı uşaq, 7-si böyükdür. Daha sonra zərərçəkənlərdən bir ana və övladı Respublika Toksikologiya Mərkəzinə yerləşdirilib, vəziyyətləri stabildir.
S.Əhmədova onu da qeyd edib ki, zərərçəkənlər arasında ciddi xəsarət alanlar yoxdur.
