AMB və Dünya Bankı əməkdaşlığın gələcək perspektivlərini müzakirə ediblər
  • İQTİSADİYYAT

  • 17:17 03 İyun 2019

AMB və Dünya Bankı əməkdaşlığın gələcək perspektivlərini müzakirə ediblər

Azərbaycanda səfərdə olan Dünya Bankının (DB) Cənubi Qafqaz ölkələri üzrə sabiq regional direktoru xanım Mersi Tembon və yeni regional direktoru Sebastian Molineus ilə Azərbaycan Mərkəzi Bankının (AMB) sədri Elman Rüstəmov arasında görüş keçirilib.

ONA-nın AMB-yə istinadən verdiyi məlumata görə, görüşdə M. Tembon regional direktor vəzifəsində çalışdığı zaman DB tərəfindən Azərbaycanda görülmüş işlər barədə məlumat verdi. Sonra DB-nin Cənubi Qafqaz ölkələri üzrə yeni regional direktorunu təqdim edərək onun DB-nin fəaliyyətinin müxtəlif istiqamətlərində geniş təcrübəyə malik olduğunu qeyd edib.

Öz növbəsində AMB-nin sədri E. Rüstəmov Dünya Bankının Azərbaycanla 25 ildən çox olan əməkdaşlığı dövründə inkişafın bütün istiqamətlərində DB-dən  Azərbaycana göstərilmiş hərtərəfli maliyyə, təşkilati, texniki və intellektual dəstəyin əhəmiyyətini qeyd etdi. E. Rüstəmov bu istiqamətdə xanım M. Tembonun DB-nin Cənubi Qafqaz ölkələri üzrə rəhbərlik etdiyi dövrdə həyata keçirdiyi fəaliyyəti də yüksək qiymətləndirib.

E. Rüstəmov yeni regional direktor S. Molineusa Azərbaycanda həyata keçirəcək fəaliyyətində uğurlar arzulayıb. O, ölkədəki makroiqtisadi vəziyyət, iqtisadiyyatın şaxələnməsi və qeyri-neft sektorunun inkişafı, ölkənin xarici mövqeyi, Mərkəzi Bankın pul və məzənnə siyasəti məsələləri və bu sahədə həyata keçirilən islahatlar barədə ətraflı məlumat verdi. Həmçinin, E. Rüstəmov qlobal və regional iqtisadi çağırışlar fonunda Azərbaycanın DB ilə əməkdaşlığının daha da dərinləşəcəyinə və ölkəmizin DB-nin institusional təcrübəsindən faydalanacağına əminliyini ifadə edib.

Nümayəndə heyətinin rəhbəri M. Tembon son illərdə Azərbaycan hökuməti tərəfindən dayanıqlı iqtisadi artımın təmin olunmasında özəl sektorun iştirakının genişləndirilməsi ilə ölkə iqtisadiyyatının şaxələndirilməsi istiqamətində mühüm səylərin göstərildiyini qeyd edib. O, DB-nin Azərbaycanda fəaliyyətinin uğurla davam olunmasına, həmçinin keçirdiyi tədbirlərə göstərdiyi dəstəyə görə Mərkəzi Bankın sədrinə öz təşəkkürünü bildirdi. Eyni zamanda əminliyini bildirdi ki, yeni regional direktor S. Molineus ilə də faydalı əməkdaşlıq həyata keçiriləcək.

Görüş zamanı Mərkəzi Bank ilə Dünya Bankı arasında əməkdaşlığın gələcək perspektivləri ətrafında geniş fikir mübadiləsi aparılıb.

OXŞAR XƏBƏRLƏR