Azərbaycan İqtisadiyyat Nazirliyinin nəzdində fəaliyyət göstərən Sahibkarlığın İnkişafı Fondu tərəfindən bu günədək 36 min sahibkarlıq subyektinə ümumi dəyəri 5,5 mlrd. manat olan layihələrə 2,3 mlrd. manat güzəştli kreditlər verilib.
ONA-nın xəbərinə görə bunu “Dayanıqlı İnkişaf Məqsədlərinin icrasında özəl şirkətlərin rolu” mövzusunda təşkil olunan tədbirdə çıxış edən Azərbaycan İqtisadiyyat nazirinin müavini Sahib Məmmədov deyib.
Onun sözlərinə görə, bu maliyyələşdirilmiş layihələrin 1 mlrd. manatı dövlət büdcəsindən ayrılmış vəsaitdir, 1,3 mlrd. manatı isə məhz geri qaytarılan vəsaitlər hesabına təmin olunub.
"Yəni son 3 il ərzində Sahibkarlığın İnkişaf Fonduna dövlət büdcəsindən maliyyələşmə ayrılmır. Bu da o deməkdir ki, real sektora qoyulan investisiyalar öz nəticəsini verməkdədir və geri qaytarılan vəsaitlər növbəti investisiya layihələrin maliyyələşdirilməsinə yönəldilir", - deyə nazir müavini qeyd edib.
