Bu il Xəzərin Azərbaycan sektorunda yerləşən "Ümid" yatağından 1 mlrd. kubmetrə yaxın qaz hasil ediləcək. ONA-nın məlumatına görə, bu barədə jurnalistlərə adının çəkilməsini istəməyən hökumətdən olan mənbə söyləyib.
Onun sözlərinə görə, yataqdan bu il 900-950 mln. kubmetrə yaxın qaz hasil ediləcək.
Qeyd edək ki, "Ümid" yatağından 2012-ci ilin sentyabrın 19-dan bu vaxta qədər 2,16 mlrd. kubmetrə yaxın qaz hasil edilib. Hesabat dövründə yataqdan 345 min kondensat hasil edilib. Yataqda üç quyudan gündəlik 2,4 mln. kubmetr qaz və 380 ton kondensat hasil edilir.
Xatırladaq ki, "Ümid" yatağı Bakıdan 75 km cənuba, qurudan isə 40 km məsafədə yerləşir. Yataq 2010-cu ildə kəşf edilib. Bu, SOCAR-ın kəşf etdiyi ilk yataq olub. İlkin hesablamalara görə, yatağın ehtiyatı 200 mlrd. kubmetr qaz və 40 mln. ton kondensat həcmində qiymətləndirilir.
