Dövlət Gömrük Komitəsinin (DGK) sədri, gömrük xidməti general-leytenantı Səfər Mehdiyev Macarıstanın Azərbaycandakı səfiri Viktor Sederkenyinin rəhbərlik etdiyi nümayəndə heyəti ilə görüşüb.
ONA DGK-yə istinadən xəbər verir ki, S. Mehdiyev Azərbaycanla Macarıstan arasında qarşılıqlı faydalı əməkdaşlıq münasibətlərinin səviyyəsindən məmnunluğunu ifadə edib, əlaqələrin bundan sonra da müsbət məcrada inkişaf edəcəyinə ümidvar olduğunu bildirib.
Azərbaycan iqtisadiyyatının formalaşmasında mühüm rolu olan gömrük işinin daha səmərəli və şəffaf şəkildə qurulması istiqamətində həyata keçirilən tədbirlər barədə də məlumat verən S. Mehdiyev Prezident İlham Əliyevin gömrük sistemində həyata keçirdiyi islahatların Azərbaycan gömrüyünün beynəlxalq aləmdə etibarının artmasına, müasir texnologiyaların və innovativ layihələrin tətbiq edildiyi qabaqcıl, mütərəqqi quruma çevrilməsinə şərait yaratdığını diqqətə çatdırıb.
Komitə sədri qarşılıqlı əlaqələrin genişlənməsində gömrük orqanlarının da üzərinə mühüm vəzifələrin düşdüyünü deyib, Azərbaycan və Macarıstan gömrük xidmətləri arasında əməkdaşlıqdan söhbət açıb. S. Mehdiyev bu əlaqələrin daha da intensivləşdirilməsinin, əməkdaşlığın dərinləşdirilməsi üçün qarşılıqlı fəaliyyətin, təcrübə mübadiləsinin əhəmiyyətini önə çəkib.
Öz növbəsində V. Sederkenyi Azərbaycanda sürətli iqtisadi inkişaf tempindən, gömrük sistemində aparılan islahatlardan məmnun qaldığını bildirib, ölkələrimiz arasında iqtisadi, siyasi və mədəni əlaqələrin hazırkı durumunu yüksək qiymətləndirib.
Səfir Macarıstanın Azərbaycanla bütün sahələrdə əməkdaşlığa xüsusi önəm verdiyini qeyd edərək, əməkdaşlığın genişləndirilməsi üçün böyük potensial olduğunu və bu potensialdan səmərəli istifadənin ikitərəfli əlaqələrin inkişafında əhəmiyyətini vurğulayıb. Macarıstan ilə Azərbaycan arasında gömrük sferasında əməkdaşlıq əlaqələrinə də nəzər salan qonaq iki ölkənin uyğun qurumlarının müsbət məcrada inkişaf edən qarşılıqlı əməkdaşlığından razılıqla danışıb.
