İranın bazarı Azərbaycan investorları üçün tam açıqdır və İran tərəfi mövcud əlaqələri genişləndirmək üçün ən optimal yol kimi müştərək müəssisələrin yaradılmasını görür.
ONA-nın məlumatına görə, bunu İranın iqtisadi işlər və maliyyə naziri Fərhad Dejpəsənd Azərbaycan-İran biznes və investisiya forumu çərçivəsində çıxış edərkən deyib.
Onun sözlərinə görə, bu əlaqələr hər iki tərəfin tələblərinə uyğun qurulmalıdır.
"2018-ci ildə İranla Azərbaycan arasındakı ticarət əlaqələri 74% artıb, bu əlaqələri daha da inkişaf etdirmək üçün böyük potensial mövcuddur. İranla Azərbaycan arasında olan əlaqələr çox yüksək səviyyədə inkişaf edir. Son 5 ildə ölkə başçılarımız 12 dəfə görüşüblər. Bir sıra yüksək səviyyəli nümayəndə heyətlərinin görüşləri baş tutub. Bütün bunlar çox böyük və geniş əlaqələrin olduğunun bariz nümunəsidir", - deyə iranlı nazir bildirib.
Nazir əlavə edib ki, iki ölkə arasında su və hava nəqliyyatı sahələrində də əlaqələri genişləndirmək üçün böyük potensial mövcuddur: "Ticarət əlaqələrinə gəldikdə isə, biz müştərək bağlantı yaratmaqla daha geniş bazarlara çıxmağımızı fikirləşməliyik. Eləcə də biz maliyyə və bank sahəsində yeniliklərə imza ata bilərik", - deyə nazir vurğuladı.
İran gömrüyünün mövcuddur problemlərindən danışan nazir qeyd edib ki, bu problemləri çox qısa zamanda həll etmək mümkün olacaq.
