Omanda Azərbaycan məhsullarının pavilyonu açılacaq. Bunu ONA-ya Ərəb Ölkələrinin Əməkdaşlığı Assosiasiyasının icraçı direktoru Yalçın Əliyev deyib.
Onun sözlərinə görə, bu ölkə ilə artıq razılıq əldə olunub və pavilyonun açılması yaxın zamanda nəzərdə tutulub.
"Layihə çərçivəsində həmçinin sərgi zalı təşkil olunacaq ki burada yerli məhsullar nümayiş etdiriləcək. Malların saxlanılması üçün isə anbarların da yaradılacağı gözlənilir ki, buradan onların satışa çıxarılması nəzərdə tutulub. Qeyd edim ki, sonrakı mərhələlərdə belə layihələrin İordaniya, Bəhreyn, Livan və Səudiyyə Ərəbistanında da icrası gözlənilir. Hazırda bu məsələlər danışıqlar mərhələsindədir", - deyə Y. Əliyev bildirib.
Assosiasiyasının icraçı direktoru onu da bildirib ki, qeyd olunan ölkələrdə yerli məhsullar hazırda təmsil olunmayıb, onların təşviqi üçün isə məhsullar əyani olaraq bu bazarlarda nümayiş olunacaq və bu işə marketoloqlar cəlb olunacaq.
