Bu ilin noyabrın 25-də Trans-Adriatik qaz boru kəməri (TAP) konsorsiumu kəmərin Yunanıstandakı Evros çayı ilə Kipoidəki kompressor stansiyası arasındakı 2 km hissəsinə təbii qazın doldurulmasına start verib.
TAP konsorsiumdan “APA-Economics”ə verilən məlumata görə, bu, boru kəmərlərinin istismara verilməsi prosesinin ilkin mərhələsidir. Qaz kəmərinin sözügedən hissəsinin doldurulmasının məqsədi milli və beynəlxalq təhlükəsizlik və istismar standartlarına uyğun olaraq infrastrukturun tamamilə təhlükəsizliyini və proses başa çatdıqdan sonra istismara hazır olmasını təmin etməkdir.
Məlumata əsasən, qazın boru kəməri sisteminə daxil edilməsi “Şahdəniz” (Xəzərin Azərbaycan sektorunda yerləşən qaz-kondensat yatağı) qazının Avropaya tədarükünün başlanğıcındakı növbəti addımdır. TAP vasitəsilə kommersiya qazının nəqli 2020-ci ilin oktyabrda başlayacaq.
