Nazirlər Kabineti Bakı şəhəri Süleyman Rüstəm küçəsi 10 ünvanındakı "Salaam Cinema"nın yerləşdiyi tarixi bina ilə bağlı rəy vermək üçün AMEA-ya müraciət edub.
Bu barədə ONA-nın sorğusuna cavab olaraq Nazirlər Kabinetinin mətbuat xidmətindən bildirilib.
Sorğuya cavabda bildirilib ki, xalqımızın keçmişini özündə yaşadan, əsrlərin sınağından çıxmış qədim tarixi-mədəni abidələrimizi qoruyaraq gələcək nəsillərə çatdırmaq hər birimizin ən ümdə vəzifəsidir. Bu gün mədəni irsimizin qorunması, inkişafı və təbliği istiqamətində Azərbaycan höküməti tərəfindən təxirəsalınmaz tədbirlər görülür, bu sahədə vəziyyət daim diqqət mərkəzindədir: "Azərbaycan Respublikası ərazisində dövlət mühafizəsinə götürülmüş daşınmaz tarix və mədəniyyət abidələrinin əhəmiyyət dərəcələrinə görə bölgüsü siyahısına əlavələr edilməsi ilə bağlı Nazirlər Kabinetinə mütəmadi olaraq müxtəlif dövlət qurumlarından müvafiq təkliflər daxil olur. Həmin təkliflər Nazirlər Kabinetində qanunvericiliklə müəyyən edilmiş qaydada və müddətdə digər səlahiyyətli dövlət orqanlarının da rəyi nəzərə alınmaqla nəzərdən keçirilir. Bakı şəhəri Süleyman Rüstəm küçəsi 10 ünvanında yerləşən tarixi bina artıq Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən yeni aşkar olunan tarixi abidələr siyahısına salınıb. Mədəniyyət Nazirliyi eyni zamanda bu binanın dövlət tərəfindən qorunan tarixi abidələr siyahısına salınması təşəbbüsü ilə Nazirlər Kabinetinə müraciət edib. Nazirlər Kabineti qanunvericiliyə uyğun olaraq bu təklifə zəruri rəy verilməsi üçün Azərbaycan Respublikası Milli Elmlər Akademiyasına müraciət ünvanlayıb. Tarixi bina ilə bağlı Azərbaycan Milli Elmlər Akademiyasının rəyi nəzərə alınaraq müvafiq qərar qəbul ediləcək”.
Qeyd edək ki, Bakının hazırkı Süleyman Rüstəm küçəsində yerləşən bina 1913-cü ildə tikilib. Hazırda binada “Salaam Cinema Baku” adlı klub fəaliyyət göstərir. Binanın 2008-ci ildə özəlləşdirildiyi, son vaxtlar isə binanın sahibinin “Salaam Cinema Baku”dan oranı boşaltmağı tələb etdiyi bildirilir.
“Salaam Cinema Baku” klubunun əməkdaşları və tamaşaçıları binanın söküləcəyini əsas gətirərək oranı tərk etmək istəmədiklərini bildiriblər. Onlar qədim binanın qorunması üçün Azərbaycanın Birinci vitse-prezidenti Mehriban Əliyevaya müraciət ediblər. Bundan sonra Mehriban Əliyeva özünün “İnstagram” səhifəsində açıqlama yayaraq, Bakının Süleyman Rüstəm küçəsindəki qədim bina ətrafında yaranmış vəziyyətin dövlətin nəzarəti altında olduğunu bildirib.
Bundan sonra Mədəniyyət Nazirliyi Süleyman Rüstəm küçəsi 10 ünvanında, "Salaam Cinema"nın yerləşdiyi binanın dövlət tərəfindən qorunan tarixi abidələrin siyahısına salınması ilə bağlı Nazirlər Kabinetinə müraciət ünvanlayıb.
