Kabildəki terror aktı ilə əlaqədar ABŞ-ın Azərbaycandakı səfirliyində dövlət bayrağı yarıya qədər endiriləcək.
Bu barədə APA-ya səfirlikdən məlumat verilib.
Qeyd edilib ki, ABŞ Prezidenti Co Bayden Əfqanıstanın paytaxtı Kabildə 26 avqust tarixində törədilən terror aktı nəticəsində həlak olan ABŞ hərbçilərinin və digər qurbanların xatirəsini ehtiramla yad edərək Ağ Evdə və bütün ictimai binalarda və ərazilərdə, bütün hərbi postlarda və dəniz stansiyalarında, federal hökumətə məxsus bütün dəniz gəmilərində, habelə bütün xaricdə yerləşən hərbi obyektlər, dəniz gəmiləri və stansiyaları da daxil olmaqla, ABŞ-ın bütün səfirliklərində, nümayəndəliklərində, konsulluq idarələrində və digər obyektlərdə 30 avqust tarixinə kimi dövlət bayrağının yarıya qədər endirilməsi ilə bağlı göstəriş verib.
Xatırladaq ki, Kabil aeroportunda törədilən terror aktı nəticəsində 13 ABŞ hərbçisi ölüb.
