Milli Məclisdə ABŞ Konqresinin əməkdaşları ilə görüş keçirilib
  • SİYASƏT

  • 17:59 30 May 2019

Milli Məclisdə ABŞ Konqresinin əməkdaşları ilə görüş keçirilib

Bu gün Milli Məclisin Azərbaycan-ABŞ parlamentlərarası əlaqələr üzrə işçi qrupunun üzvləri ilə ABŞ Konqresinin ölkəmizdə səfərdə olan əməkdaşlarının görüşü olub. 

ONA-nın məlumatına görə, görüşdə Endryu Hudson, Devin Viser, Karson Middlton, Ryan Etington, Sara Miller, Sara Matar, Kennet Depyu, Jess von Stein iştirak ediblər.

Qonaqlar öncə parlamentin binası ilə tanış olublar, iclas salonunda Milli Məclisin plenar iclasının gedişini izləyiblər.

Görüşdə Milli Məclisin Beynəlxalq münasibətlər və parlamentlərarası əlaqələr komitəsinin sədri, Azərbaycan-ABŞ parlamentlərarası əlaqələr üzrə işçi qrupunun rəhbəri Səməd Seyidov qonaqlara Azərbaycan parlamentinin strukturu və tərkibi barədə məlumat verib. 

Söhbət zamanı öncə Azərbaycanda təhlükəsizlik məsələləri və Avroliqanın dünən Bakıda keçirilən final oyunu diqqət mərkəzində  olub. Yarışın yüksək səviyyədə təşkil edildiyi vurğulanıb. Dilindən, dinindən, siyasi baxışlarından asılı olmayaraq ölkəmizə gələn istənilən turistin burada azad və rahat surətdə gəzib-dolandığı qeyd edilib. “Arsenal”ın futbolçusu H.Mxitaryanla bağlı ermənilərin apardığı çirkin təbliğatın puça çıxdığı bildirilib. ABŞ Konqresi əməkdaşlarının nəzərinə çatdırılıb ki,  ermənilər idmanı da siyasi alətə çevirməyə çalışırlar. 

Qonaqlara Dağlıq Qarabağ münaqişəsinin tarixi barədə danışan  deputatlar Səməd Seyidov, Sevinc Fətəliyeva, Asim Mollazadə, Nəsib Məhəməliyev vurğulayıblar ki, Dağlıq Qarabağı və ətrafdakı 7 rayonu işğal etmiş olan Ermənistan həmin ərazilərdə etnik təmizləmə aparıb. Son 30 ildə işğalçılıq siyasəti yürüdən və soydaşlarımıza qarşı amansız cinayətlər törədən Ermənistan rəhbərliyi Azərbaycan torpaqlarını qaytarmaq niyyətində deyil. Ona görə də, münaqişənin sülh yolu ilə həllinə imkan vermir, status-kvonu saxlamağa çalışır. 

Bu münaqişənin ədalətli həllində, Azərbaycanın ərazi bütövlüyünün və suverenliyinin de-fakto təmin olunmasında ATƏT-in Minsk qrupunun həmsədri kimi ABŞ-ın dəstəyinə ciddi ehtiyac var.

Görüş zamanı Azərbaycan-ABŞ parlamentlərarası əlaqələr üzrə işçi qrupunun üzvləri amerikalı qonaqları maraqlandıran suallara cavab veriblər.

Mirmahmud Kazımoğlu

Teqlər: ABŞ Konqresi Milli Məclis bütün xəbərlər

OXŞAR XƏBƏRLƏR