Azərbaycan və Gürcüstan prezidentləri delimitasiya işlərini başa çatdırmaq üçün tapşırıq verəcək
  • SİYASƏT

  • 15:54 27 Fevral 2019

Azərbaycan və Gürcüstan prezidentləri delimitasiya işlərini başa çatdırmaq üçün tapşırıq verəcək

“Biz insan əlaqələrinə, mədəniyyətə, təhsilə böyük əhəmiyyət veririk və bu sahələr inkişaf etdirilməlidir. Bu sahələrdə əlaqələr hələ tam lazımi səviyyədə deyil”.

ONA-nın məlumatına görə, bunu bu gün Gürcüstan Prezidenti Salome Zurabişvili Prezident İlham Əliyev ilə geniş tərkibli görüşdən sonra  mətbuata bəyanatda bildirib.

Gürcüstan Prezidenti deyib ki, hər iki tərəf bu məsələlərdə öz səylərini daha da fəallaşdırmalıdır: “Biz istərdik ki, insani münasibətlər hər iki tərəfdən daha da fəallaşsın. Bu, bizim qərarlardan asılı olacaq. Biz istəyirik ki, Gürcüstanda Azərbaycan mədəniyyət günləri keçirilsin və Batumidə artıq planlaşdırılıb. Biz buna mütəmadi forma verməliyik və müxtəlif sahələrdəki əlaqələrimiz mədəniyyət sahəsində də fəallaşmalıdır. Biz Gürcüstanın tolerantlığını UNESCO-nun qeyri-mədəni irs siyahısına daxil etmək istərdik. Lakin bu, Qafqazda bizim ümumi dəyərimizdir. Biz buna Qafqaz xarakteri verə bilərik və bu, regionumuzdan dünyaya çox mühüm mesaj olacaq. Dünyanın bu dəyərlərə ehtiyacı var”.

Salome Zurabişvili nəzərə çatdırıb ki, görüşdə turizmin inkişafı haqqında da fikir mübadiləsi aparılıb: “Turizm sahəsi də inkişaf etdirilməlidir. Bu məkan turistlər üçün tam açıq olmalıdır. Biz dostluğumuza əsaslanaraq belə qərara gəldik ki, delimitasiya komissiyasına öz işlərini yeniləmək və bu çalışmaları sona çatdırmaq üçün tapşırıq verək. Sərhəd də bizi birləşdirən amildir. Ümid edirəm ki, bu məsələ bizim dostluq əlaqələrimiz əsasında həll olunacaqdır. Bütün bu sahələrdə əməkdaşlığa və bu səmimi qəbula görə cənab Prezidentə təşəkkür edirəm. İnanıram ki, bu, başlanğıcdır, yeni, daha sıx əlaqələrimizin başlanğıcıdır. Mən bu arzu və bu ümidlə çıxışımı bitirmək istərdim”.

 

 

Ramiz Mikayıloğlu

Teqlər:

OXŞAR XƏBƏRLƏR