Baş epidemioloq: "Ölkədə koronavirus epidemiyasının olması haqda iddialar əsassızdır"
  • SOSİAL

  • 11:34 28 Fevral 2020

Baş epidemioloq: "Ölkədə koronavirus epidemiyasının olması haqda iddialar əsassızdır"

"Hazırda ölkədə epidemioloji həddi aşan heç bir yoluxucu xəstəlik qeydə alınmayıb".

ONA xəbər verir ki, bunu Səhiyyə Nazirliyinin baş epidemioloqu, Azərbaycan Tibb Universitetinin (ATU) Epidemiologiya kafedrasının müdiri, professor İbadulla Ağayev ATU mətbuat xidmətinə açıqlamsında bildirib. İ. Ağayev ölkədə koronavirus epidemiyasının olması ilə bağlı iddiaların əsassız olduğunu deyib. Yalan informasiyalarla əhali arasında panika yaratmağın düzgün olmadığını vurğulayıb. İ.Ağayev qeyd edib ki, ölkədə koronavirusa yoluxma faktı aşkarlansa, bu haqda dərhal ictimiayyətə məlumat veriləcək: “Təşviş üçün heç bir əsas yoxdur. Olmayan bir halın mövcudluğunu necə təsdiqləyə bilərik?! Əgər belə bir təhlükə olsa, onu gizlədən deyilik”.

İ. Ağayev sosial şəbəkələrdə buruna perekis tökməklə virusa yoluxmanın qarşısının alınmasına dair verilən məsləhətlərə də münasibət bildirib: "Bu metoddan özbaşına istifadə etmək məsləhət deyil. Əvvəlcə, həkimlə məsləhətləşmək lazımdır. Çünki bildiyiniz kimi, perekis qıcıqlanma yarada bilən bir məhluldur. Hazırda bütün xəstəxanalarımız gücləndirilmiş rejimdə işləyirlər.Ona görə də insan özündə nəsə hiss edərsə, həkimə müraciət etməsi məsləhətdir”.

Baş epidemioloq bildirir ki, gün ərzində əlləri və üzü sabunla yumaq daha effektiv metoddur: “Sabun məhlulu ilə burun dəliklərini də yumaq olar. Alternativ variant kimi “Oksalin” məlhəmini də qorunmaq üçün burun dəliklərinə sürtmək olar”.

Qoruyucu maska taxılmasına gəlincə, mütəxəssis bunun ətrafında ajiotaj yaradılmasını düzgün saymır: "Çünki xəstələnməyən insanın maska taxması məntiqli deyil. Əgər bu virus ölkədə varsa, maska taxılsa da, insana keçəcək. Əgər mən xəstələnməmişəmsə, niyə qoruyucu maska taxım? Bu gün insanları narahat edəcək hal yoxdur. Əminliklə deyə bilərəm ki, Azərbaycanda koronavirus yoxdur. Bir daha qeyd edirəm ki, virusdan qorunmaq üçün gigiyenik normalara əməl etmək daha yaxşı olar”.

Qeyd edək ki, Azərbaycanda koronavirusla bağlı Elmi Tədqiqat Ağciyər Xəstəlikləri İnstitutu, 1 saylı Kliniki Tibbi Mərkəz və 7 saylı Uşaq infeksion xəstəxanasında xüsusi palatalar ayrılıb.

OXŞAR XƏBƏRLƏR