Bu gün Beynəlxalq Mətbuat Mərkəzində Azərbaycan Mətbuat Şurasının təşkilatçılığı ilə “Mətbuat azadlığı bəşəri mahiyyət və Azərbaycan reallığı” mövzusunda konfrans keçirilib.
ONA-nın məlumatına görə, tədbirdən öncə iştirakçılar Fəxri Xiyabanda Heydər Əliyevin, Zərifə Əliyevanın və Həsən bəy Zərdabinin, daha sonra "Qurd qapısı" qəbiristanlığında jurnalist Elmar Hüseynovun məzarlarını ziyarət ediblər.
Tədbiri açıq elan edən Mətbuat Şurasının sədri, deputat Əflatun Amaşov bildirib ki, 1993-cü ildə Afrika jurnalistləri üçün konfrans düzənlənib və həmin konfransda Afrika jurnalistikasına beynəlxalq təşkilatların köməyi müzakirə olunub: "Artıq o zamandan 3 may tarixi hər il önəmli gün kimi qeyd olunur. Bir məsələni qeyd edim ki, media cəmiyyətdə baş verən xəbərləri çatdırmalıdır. Həbsdə olan jurnalistlərin tezliklə azad olunması, onların problemlərinin işıqlandırılması medianın əsas qayəsidir".
Şura sədri qeyd edib ki, Azərbaycan mediası müstəqil mediadır: "Cəmiyyətdə nə hadisə baş verirsə, dərhal müzakirəyə çıxarılır. Bu müzakirə istər mətbuat, istərsə də sosial şəbəkə vasitəsilə aparılır. Bu da Azərbaycanda media azadlığından irəli gəlir. Təbii ki, mediamızda bəzi problemlər də var. Amma iqtisadi baxımdan çox güclü mediaya sahibik. Azərbaycan mediası heç bir zaman basqılara məruz qalmır. Biz bu yaxınlarda monitorinq keçirdik. Nəticələrini ictimaiyyətə təqdim edəcəyik".
Ə.Amaşov qətlə yetirilmiş jurnalist Elmar Hüseynovun qatillərinin tapılması üçün hüquq-mühafizə orqanlarına müraciət edib: "Bilirsiniz ki, Azərbaycan mətbuatı "Əkinçi" qəzeti ilə başlayır. Hüquq-mühafizə orqanlarına müraciət edirik ki, Elmar Hüseynovun qatillərinin tapılması istiqamətində köməklik göstərsinlər və qatilin kimliyini müəyyənləşdirib ona layiq olduğu cəzanı versinlər".
"Yeni Azərbaycan" qəzetinin baş redaktoru, deputat Hikmət Babaoğlu deyib ki, Azərbaycanda söz və mətbuat azadlığı ulu öndər Heydər Əliyevin adı ilə bağlıdır: "Söz azadlığının hüdudları o qədər genişdir ki, bu medianın inkişafı deməkdir. Xoş halımıza ki, biz azərbaycanlılar söz və mətbuat azadlığının hörmət edildiyi bir dönəmdə yaşayırıq".
Beynəlxalq Avrasiya Mətbuat Fondunun rəhbəri Umud Mirzəyevin sözlərinə görə, bu gün BMT səviyyəsində dezinformasiyalarla bağlı jurnalistikanın seçim qarşısında olduğu vurğulanır: "Hazırda jurnalistika sahəsində həqiqətlə yalan arasında mübarizə gedir. Bu da onsuz da neqativ halların baş verdiyi qlobal dünyada mənfi hadisələrə səbəb olur. Dünyanın super gücləri qarşı-qarşıya gəlməli olur. Hesab edirəm ki, həqiqəti olduğu kimi çatdırmaq üçün mətbuatın üzərinə məsuliyyət düşür".
MŞ İdarə Heyətinin üzvü Azər Həsrət bildirib ki, Ermənistanın işğalçılıq siyasəti nəticəsində Salatın Əsgərova və daha 6 jurnalistimiz qətlə yetirilib: "Bundan əlavə, Azərbaycanın daha iki jurnalisti Dağlıq Qarabağda qətlə yetirilib. Azərbaycan əsgəri isə bir dəfə olsa belə, erməni jurnalistinə atəş atmayıb. Mən eyni zamanda təəssüf hissi ilə qətlə yetirilən jurnalist Elmar Hüseynovun üzərində siyasi manipulyasiyaların olduğunu demək istəyirəm. Onun adından manipulyasiya edib qrant almağa son qoyulmalıdır. Əgər kimsə qrant almaq istəyirsə, alsın. Amma çağırışlara son qoysun".
Tədbirdə "525-ci" qəzetin baş redaktoru Rəşad Məcid, "Bakı-Xəbər" qəzetinin baş redaktoru Aydın Quliyev də çıxış ediblər.
