MTRŞ sədri 102,0 radio tezliyinə elan edilmiş müsabiqənin ləğvinə münasibət bildirib
  • SOSİAL

  • 11:54 16 Yanvar 2020

MTRŞ sədri 102,0 radio tezliyinə elan edilmiş müsabiqənin ləğvinə münasibət bildirib

Milli Televiziya və Radio Şurasının (MTRŞ) sədri Nuşirəvan Məhərrəmli ümumrespublika radio kanalının açılması üçün Bakı şəhəri və Abşeron yarımadası ərazisində 102,0 MHz işçi tezliyinə elan edilmiş müsabiqənin ləğv olunmasına münasibət bildirib.

ONA-nın xəbərinə görə, N. Məhərrəmli bildirib ki, müsabiqənin ləğv olunmasının səbəbi sənədlərini təqdim edən 5 hüquqi şəxsdən üçünün iddiasını geri götürməsi ilə əlaqədardır.

“Bu halda qanun müsabiqənin keçirilməsinə icazə vermir. Bu səbəbdən Milli Televiziya və Radio Şurasının “Teleradio yayımı sahəsində lisenziya üçün keçirilən müsabiqənin Qaydaları”nın 2.1.8.-ci bəndinə (Şura müsabiqədə 3-dən az iştirakçı iştirak etdikdə müsabiqəni ləğv edə və ya yeni müsabiqə elan edə bilər) əsasən, Şura müsabiqənin ləğv olunması barədə qərar qəbul edib. Əgər gələcəkdə ehtiyac olarsa, Milli Televiziya və Radio Şurası tərəfindən müsabiqə yenidən elan ediləcək”, - deyə MTRŞ sədri vurğulayıb.

 

Qeyd edək ki, ümumrespublika radio kanalının açılması üçün Bakı şəhəri və Abşeron yarımadası ərazisində 102,0 MHz işçi tezliyinə 12 noyabr 2019-cu il tarixindən 12 dekabr 2019-cu il tarixinədək elan edilmiş müsabiqənin nəticələri ləğv edilib. Müsabiqə üçün sənədlərini Şuraya 5 iddiaçı - “Real Təhlil İnformasiya Mərkəzi” MMC; “TV-Media Azerbaijan” MMC; “Balans Studiyası” MMC; “İNS ÇM” MMC; “OMD Azerbaijan” MMC təqdim etmişdi. Sonradan üç iddiaçı - “TV-Media Azerbaijan” MMC, “OMD Azerbaijan” MMC və “Real Təhlil İnformasiya Mərkəzi” MMC sonradan müsabiqədə iştirak etməkdən imtina edib.

ONA

Teqlər: MTRŞ radio kanalı