Prezidentin köməkçisi: "Metronun açılması müzakirə olunur"
  • SOSİAL

  • 11:36 29 Avqust 2020

Prezidentin köməkçisi: "Metronun açılması müzakirə olunur"

“Avqustun 5-dən yumşalmalara gedilir”.

APA-nın məlumatına görə, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev  bildirib. 

H. Hacıyev deyib ki, bu günkü yumşalmalar hər kəsi sevindirir: “Amma açılmalarla, yumşalmalarla əlaqədar müəyyən artımlar baş verə bilər. Bəzi yerli klastrlarda artımlar meydana çıxır. Bu kimi hallar bizi ehtiyatlı olmağa vadar edir. Məsələn, bu günlərdə Şirvan şəhərində xəstəxanada belə bir ocaq aşkarlandı və lokal karantin mexanizminin tətbiqinə üstünlük verildi. Bu, onu göstərir ki, virusun hər zaman müəyyən klastrlarda alovlanması baş verə bilər”.

Azərbaycan Prezidentinin köməkçisi qeyd edib ki, məktəblərin açılması da bir valideyn kimi hamını sevindirir: “Ancaq hamının qaydalara riayət etmək öhdəliyi var”.

H. Hacıyev nəzərə çatdırıb ki, Bakı, Sumqayıt şəhərləri və Abşeronda məhdudiyyətlər davam edəcək: “Bu məntəqələrdə yayılma tendensiyası daha yüksək səviyyədədir. Bu da rayonlararası əlaqələrə təkrar baxılmasını gündəmə gətirir. Metropolitenin fəaliyyəti də müzakirə mövzusudur. Məktəblərin açılması ilə əlaqədər tələbə və şagirdlərin metrodan istifadəsi ilə bağlı metropolitenin açılması müzakirə olunur, potensial risklər qiymətləndirilir. Bu barədə qərarlar qəbul ediləndə ölkə ictimaiyyətinə məlumat veriləcək". 

H. Hacıyev onu da deyib ki, ictimai nəqliyyatda sıxlığın aradan qaldırılması üçün avtobusların sayı artırılır. Onun sözlərinə görə, məktəblərin açılması ilə əlaqədar avtobusların sayı yenə artırılacaq: “Dərslərin də müxtəlif günlərdə keçirilməsi nəzərdə tutulur. Eyni zamanda valideynlərə də bu sahədə müəyyən hüquqlar verilir”.

Azərbaycan Prezidentinin köməkçisi qeyd edib ki, metro ilə əlaqədar ekspertlər müxtəlif potensial risk amillərinin olduğunu bildirir: “Metroda ventilyasiya və dar, qapalı məkan olması müəyyən qədər ehtiyatlı davranmağa əsas verir. Sentyabrın 15-nə qədər bu məsələlərə yenidən baxılacaq”.
 

 

ONA

Teqlər:

OXŞAR XƏBƏRLƏR