“Dünən daha 438 nəfərin koronavirusa yoluxma qeydə alındı və bu, indiyə qədər sutka ərzində qeydə alınan ən yüksək göstəricidir”.
APA-nın məlumatına görə, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında TƏBİB-in xəstəliklərin profilaktikası və kontrolu şöbəsinin müdiri Yaqut Qarayeva bildirib.
Y. Qarayeva deyib ki, aktiv xəstələrin sayı 5 min 299 nəfərə, ümumi yoluxanların sayı 11 min 767 nəfərə çatıb: “Biz iki həftə ərzində həftəsonu qapanmalarla bağlı gözlədiyimiz nəticəni ala bilmədik, tam əks nəticəni gördük. Biz istəyirik ki, sosial aktivliyi, bir yerə toplanmanı azaldaq. Bu gün hər bir vətəndaş infeksiya mənbəyi ola bilər, virus tənəffüs yolu ilə yayılır. Bu gün xəstəliyin peyvəndi, spesifik müdalixəsi yoxdur”.
