Bakıda keçiriləcək Avropa Liqasının finalına biletlər üçün ödəmə mərhələsi başlayıb
  • İDMAN

  • 12:57 30 Mart 2019

Bakıda keçiriləcək Avropa Liqasının finalına biletlər üçün ödəmə mərhələsi başlayıb

Mayın 29-da Bakı Olimpiya Stadionunda keçiriləcək UEFA Avropa Liqasının final oyununa biletlər üçün ödəmə mərhələsinə start verilib.

ONA-nın məlumatına görə, həlledici oyununa bilet üçün müraciət edənlərin sayı satışa buraxılan bilet sayını keçdiyindən UEFA bilet satışını lotereya sistemi vasitəsilə həyata keçirib.

Müraciətləri uğurla tamamlananlara UEFA tərəfindən elektron məktub göndərilib. 

Şanslı müraciət edənlər aprelin 9-dək ödəniş etməklə lotereyada adlarına çıxan bileti əldə edə bilərlər. Göstərilən tarixlərdə ödəniş edilmədikdə, yerdə qalan biletlər yenidən satışa buraxılacaq.

Mayın 21-dən isə aldığınız bilet mobil telefonunuza göndəriləcək. Bunun üçün mobil telefonlara UEFA-nın saytından xüsusi tətbiqi yükləmək lazımdır. Eyni zamanda, digər şəxslər üçün aldığınız biletləri onların mobil telefonuna göndərə bilərsiniz. Bu şəxslər də öz növbələrində UEFA-nın rəsmi saytında qeydiyyatdan keçməli və şəxsi hesablarını yaratmalıdırlar.

Oyun günü stadiona giriş zamanı mobil bileti aktivləşdirmək lazımdır. Bunun üçün mobil telefon IOS və ya Android sistemini dəstəkləməlidir. Biletlərin aktivləşdirilməsi ilə bağlı ətraflı məlumat www.finalbaku2019.az saytında yerləşdiriləcək.

Xatırladaq ki, final qarşılaşması üçün nəzərdə tutulan 64 000 biletdən 37 500 ədədi ümumi satışa buraxılıb. Yerdə qalan biletlər isə yerli təşkilat komitəsi, milli assosiasiyalar, maliyyə tərəfdaşları, kütləvi informasiya vasitələri (yayımçılar), eləcə də finalçı klubların azarkeşləri üçün ayrılacaq.

Tahir Hümmətov

Teqlər: Avropa Liqası final Bakı

OXŞAR XƏBƏRLƏR