Topaz Premyer Liqasının XXVI turunun bu gün keçirilən “Neftçi” - “Sumqayıt” oyunu debütlə əlamətdar olub.
ONA-nın məlumatına görə, az əvvəl başlayan matçı idarə edən Kamal Umudlu Azərbaycan çempionatının yüksək dəstəsində baş hakim kimi ilk oyununa çıxıb.
Gənc referi cari mövsümdə Premyer Liqada oyun idarə edən 14-cü hakimdir. Əvvəlki 25 turun 100 qarşılaşmasında 13 ədalət təmsilçisi baş hakim funksiyasını yerinə yetirib. Düzdür, onlardan biri - Rauf Allahverdiyev XVII turun “Keşlə” – “Sumqayıt” qarşılaşmasının (2:1) gedişində zədələnən baş hakim Rauf Cabbarovu əvəz etməklə debütünü gerçəkləşdirib. Həm Allahverdiyev, həm də XII turun “Zirə” – “Sumqayıt” matçında (3:1) debüt edən Səbuhi Bayramov karyerasındakı ilk Premyer Liqa oyununa cari mövsümdə çıxıb. Kamal Umudlu bu iki həmkarından sonra debütü cari mövsüm rəsmiləşən 3-cü baş hakimdir.
Müxtəlif səbəblərdən nəticəsi ləğv olunan oyunların nəzərə alınmadığı statistikaya əsasən 100 referidən ibarət cədvələ Xaqani Məmmədov başçılıq edir. O, Azərbaycan çempionatlarında 293 oyunu idarə edib. İlk “üçlük”də yer alan Fariz Yusifov 291, Rövşən Əhmədov isə 253 görüşdə baş hakim olub.
