“Komanda üç həftədir bir yerdədir. Son beş gündə daha 2-3 futbolçu bizə qoşulub”.
APA-nın məlumatına görə, bunu futbol üzrə Azərbaycan millisinin baş məşqçisi Nikola Yurçeviç deyib.
Yığmamız AVRO-2020-nin seçmə mərhələsi çərçivəsində sabah Macarıstanı qəbul edəcək. Oyunun baş tutacağı “Bakcell Arena”da təşkil olunan mətbuat konfransında N.Yurçeviç bildirib ki, zədəli futbolçunun olmaması müsbət amildir: “Yeganə problem Riçard Almeyda ilə bağlı idi. O da sabaha hazır olacaq. Üç gün sonra Slovakiya ilə qarşılaşacağıq. Amma indi sabahkı görüşü düşünürük. Macarıstan yığması çox güclü, böyük komandadır. Xorvatiyaya qalib gəliblər. Lakin biz də optimistik”.
- Çərçivəni Səlahət Ağayevə tapşıracağınıza işarə vurmusunuz. Emil Balayev yaxşı formada olarkən niyə məhz ona üstünlük verirsiniz?
- Bu suala cavab vermək çox asandır. Səlahət ilk görüşü yüksək səviyyədə keçirib. Emil də yaxşı qapıçıdır. Amma Səlahətə güvənirik.
- Azərbaycanın U-21 komandasının bir gün öncə seçmə mərhələ çərçivəsində Lixtenşteynə məğlubiyyəti sizə necə təsir etdi?
- Sabahkı oyunumuza bunun təsiri olmayacaq. Mənim üçün ağır məğlubiyyət oldu. Erkən qol futbolçulara mənfi təsir etdi. Amma ümumilikdə komanda oyunu yüksək səviyyədə keçirdi. Topa daha çox sahib idi. U-21 komandamız yaxşı oyunçulara malikdir. Onların gələcəkdə uğurlu çıxış edəcəyinə inanıram.
- Macarıstan hücum futbolu oynayan komandadır. İlk dəqiqələrdə qol buraxsanız, bunun əvəzini çıxmaq nə dərəcədə mümkün olacaq?
- Futbolda hər şey mümkündür. Əlbəttə, qol buraxa bilərik. Amma istərdim pozitiv düşünüm. Sabah yaxşı oyun sərgiləməyə çalışacağıq. İlk qolu buraxsaq, bunun əvəzini çıxmaq üçün əlimizdən gələni edəcəyik.
- Xorvatiya ilə görüşdə Azərbaycan yığmasının itirəcəyi heç nə yox idi və bu, yaxşı oyun sərgiləməyimizə səbəb oldu. Sabahkı qarşılaşmadan isə hər kəs qələbə gözləyir. Bu amil sizin və oyunçuların üzərində təzyiq yaratmır?
- Əlbəttə, fərqli oyunlardır. Xorvatiya ilə matçdan razı qalmışdım. Komanda kompakt şəkildə çıxış etdi. Sabah evdə oynayacağıq və daha çox hücum etməyə çalışacağıq. Balanslı oyunla çox qol şansları gözləyirəm.
- Start heyətini dəqiqləşib?
- Xeyr. Çünki yekun qərarı verməmişəm. Həll etməli olduğum bəzi məsələlər var. Xorvatiya ilə oyundakı heyətin 8-9 üzvü meydanda ola bilər.
- Dediniz ki, U-21 yığması düzgün yoldadır. Sizcə, məğlubiyyət düzgün yol deməkdir?
- Məğlubiyyətdən də müsbət məqamlar çıxarmaq olar. Hansı ki, bu gələcəkdə xeyirli ola bilər.
- Macarıstan Bakıya 3 xal üçün gəlir. Bundan hansı formada istifadə etməyi düşünürsünüz?
- Macarıstan çox güclü komandadır. Bir neçə oyunçuları Almaniya Bundesliqasında çıxış edir. Rəqibə hörmətlə yanaşırıq. Sabah müdafiədə oturmayacağıq. Müdafiə ilə hücum arasında balans yaratmağa çalışacağıq. Müdafiədə Xorvatiyaya qarşı olduğu kimi oynayacağıq. Eyni zamanda, hücumda da kəsərli olmaq istəyəcəyik.
