Azərbaycan yığmasının sərbəst güləşçisi Şərif Şərifov (92 kq) Rusiya mətbuatına müsahibə verib.
ONA-nın məlumatın görə, Olimpiya, dünya və Avropa çempionu titulları qazanan yeganə pəhləvanımız Buxarestdə keçirilən qitə birinciliyindən və gələcək planlarından danışıb.
- 2012-ci ildə Olimpiya Oyunlarında qalib gəldiniz. Bundan 1 il öncə dünya çempionatında eyni uğuru qazanmışdız. Amma nədənsə Avropa çempionluğu titulu alınmırdı. Bu mükafatı qazanmaq sizin üçün nə dərəcədə prinsipial idi?
- Bu ilə qədər 4 dəfə Avropa çempionatında çıxış etmişəm. Onların ikisində gümüş, birində bürünc medal qazanmışam. Bu yarışda qalib gəlmədən idmandan getmək istəməzdim. Ona görə də özüm özümə dedim ki, ya indi, ya da heç vaxt.
- Bəs qələbə necə əldə olundu?
- Avropa çempionatına yaxşı hazırlaşmışdım. Həmin ərəfədə “Taxti Kubok”unda iştirak edib, üçüncü yeri tutdum. Oradakı çıxışımdan da razıyam. Mənim üçün güləşmək, xalçanı hiss etmək vacib idi. Amma həmin vaxt qarşıma nəyin bahasına olursa-olsun çempionluq vəzifəsi qoyulmamışdı. Buxarestdə isə ilk görüşdə püşk məni Rusiya millisindəki həmyerlim Maqomed Qurbanovla üz-üzə qoydu. Biz onunla həm evdə, həm də hazırlıq üçün gəldiyi Azərbaycanda sınaq döyüşləri keçirmişik. Maqomed fiziki cəhətdən güclü güləşçidir. Gözlənildiyi kimi, onunla döyüş mənə asan olmadı. Onu keçdikdən sonra isə yolum açıldı.
- Azərbaycanda sizin komandanın Rumıniya paytaxtındakı çıxışınızı necə dəyərləndirdilər?
- Biz 3 qızıl medal qazandıq. Hətta bu, rusiyalılardan da çox idi. Yalnız türklər 3 qızıl medal əldə etmişdi. Bu yaxşı nəticədir, hamı razı qaldı.
- Saypulla Absaidovun Azərbaycan millisindəki baş məşqçi postuna qayıtması ilə nəsə dəyişib?
- Prinsipcə, o heç yerə getməmişdi. Firdovsi Umudovun vaxtında o, gənclər yığmasına rəhbərlik edir, əsas yığmanın toplanışlarına qatılır, həmişə yanımızda olurdu. Saypulla Absaidovun rəhbərliyi altında Olimpiada və dünya çempionatında qalib gəlmişdim, indi də Avropa çempionu oldum. O, yaxşı mütəxəssisdir. Həm onunla, həm də yığmanın məşqçilər korpusundakı köməkçiləri ilə çalışmaq xoşdur. Onların bu vəzifədə ilk ili deyil.
- Yəqin ki, üçüncü dəfə Olimpiya Oyunlarına qatılmaq istəyiniz barədə soruşmaq mənasızdır. Sual Tokio-2020-yə hansı çəkidə düşməyinizlə bağlıdır...
- Səhər çəki ölçmə ilə bağlı yeni reqlamentə görə, mənə 86 kq-da güləşmək çətin olacaq. 97 kq çəki dərəcəsində mübarizə aparmalı olacağam. Amma bu, 2019-cu ildə keçiriləcək dünya çempionatından sonra dəqiqləşəcək.
- Bu yarışa necə hazırlaşacaqsız?
- Mənə mayın əvvəlində Nyu-Yorkda keçiriləcək güləş şousunda iştirak təklif etdilər. Amma ora qatılmaq mənə heç nə vermir. Bu səbəbdən də dərhal imtina etdim. Əli Əliyev turnirində yarışmağa üstünlük verdim. Bundan sonra mənə daha bir yarışa qatılmaq lazımdır. Ardınca məşqçilərlə qərar verəcəyik ki, mundial öncəsi harada çıxış etmək yaxşıdır.
